கடவுள்:-
கடவுள் என்பது பொருள் பொதிந்த தமிழ்ச்சொல். கடவுளுக்கான விளக்கத்தை தமிழில்தான் தேட வேண்டும். 

எழுத்து, சொல், என்று மொழிக்கு இலக்கணமும் 'பொருள்' என்று வாழ்க்கைக்கு இலக்கணமும் வகுத்து வாழ்ந்தவர்கள் தமிழ் முன்னோர். தமிழர் சமூகமாக கூடி மொழிக்கும் வாழ்க்கைக்கும் இலக்கணம் வகுத்துக் கொண்டதால் தமிழர்களுக்கு மற்ற மற்ற மொழியினர் போல தனி மனித சான்றோர்களால் முன்னெடுக்கப்பட்ட மதம் தேவைப்படவில்லை. 

'பொருள்' அகம் புறம் என இரண்டு ஆகும். புறம் என்பது வீரம், போர், தூது, வெற்றி, கொடை, நிலையாமை முதலியவற்றைக் கூறுவது ஆகும். 

அகம் என்பதில் தலைவன், தலைவி, குடும்பம் இவர்களின் ஒழுக்கம் குறித்து ஐந்திணைகள். அந்த ஐந்திணைகள் ஒவ்வொன்றிற்கும் முதற்பொருள் கருப்பொருள் உரிப்பொருள் என்று ஏராளமான விளக்கங்கள் கொண்டிருக்கிறது தமிழர்தம் பொருள் இலக்கணம்.

கருப்பொருள் இலக்கணத்தில் வருகிற பொருள் பொதிந்த தமிழ்ச் சொற்களான கடவுள், இறை, தெய்வம் மூன்றும் தமிழுக்கு மட்டுமே உரிய சொற்கள். அவைகளுக்கான விளக்கத்தை தமிழில் மட்டுமே தேடவேண்டும். மாறாக தமிழர்கள் சிலரின் சார்புகளால் புழக்கத்திற்கு வந்துவிட்டன உலக மதங்கள் என்பதால், அந்த மத அடிப்படையில் இந்த சொற்களும் தவறுதலாகப் புழங்கப் படுகின்றன என்பதால் இந்த மூன்று சொற்களை மதங்களுக்கு காவு கொடுத்துவிடக் கூடாது.

மற்ற மற்ற மதங்கள் சுட்டுகிற அவர்களின் தெய்வங்களை- இறை என்றோ கடவுள் என்றோ பொருத்த முடியாது. இறை என்ற தலைப்பிலும், கடவுள் என்ற தலைப்பிலும் தமிழ் முன்னோர் சுட்டுகிற செய்தி முற்றிலும் வேறானது. மற்ற மற்ற மதங்கள் சுட்டுகிற அவர்களின் தெய்வங்கள் குறித்து அந்தந்த மதங்கள் சொல்லுகிற செய்தி வேறானவை. 

இந்தக் கட்டுரையில் கடவுள் குறித்தே விளக்க முயல்வதால் தெய்வம் குறித்தும், இறை குறித்தும் விளக்குவதற்கு தனித்தனிக் கட்டுரைகள் தொடர்கின்றன.

கடவுள் என்றால் கடந்தும் உள்ளும் இருப்பது என்றே பொருள். கடவுள் ஆண்பாலோ பெண்பாலோ அல்ல. எல்லாவற்றுக்குள்ளும் கடந்தும் இருக்கிற வெளியின் மூன்று நிலைகளையே கடவுள் என்கிறது தமிழ். 

அந்த மூன்று நிலைகள்: 1.தான் தோன்றி இயக்கம் இல்லாத, எல்லையில்லாத, நிலம் நீர் தீ காற்று நீங்கள் நான் என்று எல்லாவற்றுக்குள்ளும் வெளியிலும் இருக்கிற வெளி. 
2.அந்த வெளியில் குறிப்பிட்ட எண்ணிக்கை உடைய, தான்தோன்றி இயக்கம் உடைய, நிலம் நீர் தீ காற்று நீங்கள் நான் என்று தான்தோன்றி இயக்கம் உடைய நாம் எல்லோரும் இயங்குவதால், நம் இயக்கத்தில் இருந்து இயக்கம் பெற்ற இரண்டாவது நிலை விண்வெளி. 
3.தனக்கு இயக்கம் வழங்கிய அனைத்தையும் இயக்க எதிரியக்கம் பெற்று நம்மை இயக்குவது விசும்பு என்பனவாகும். விசும்புதல் என்றால் குழந்தைகள் அழும்போது அடக்க முடியாமல் எழுகிற அந்த விசும்புதலைக் கொண்டதுதான் விசும்பு. 

நியூட்டனின் மூன்றாவது விதி நிகழக் காரணம் இந்த விசும்புதான். எந்த ஒரு வினைக்கும் எதிர்வினை என்பதுதானே அந்த விதி. அந்த விதியை முன்னெடுப்பதுதான் இந்த விசும்பு. ஆகவே கடவுள் என்பதை வேறு எவற்றோடும் பொருத்த முடியாது. 

கடவுள் என்பது கணினியில் உள்ள வண்தட்டு போன்றது. அது இல்லாத ஒன்றாக, எல்லை இல்லாத ஒன்றாக இருந்து, தான்தோன்றி இயக்கம் உடைய நிலம், நீர், தீ, காற்று ஆகிய நாற்திரங்களால் இயக்கம் பெற்று அவைகளை இயக்கிக் கொண்டிருக்கிறது.

உண்மையில் தலையெழுத்து என்பது மதங்கள் தெரிவிப்பது போல மனிதன் மண்டையோட்டில் காணப்படுகிற கிறல்கள் அல்ல. உங்களுக்கான தலையெழுத்து என்பது: ஐந்திர ஆற்றல்களில் (பஞ்சபூதம்) ஒன்றான விசும்பு என்கிற வண்தட்டுக்கு நீங்கள் உங்கள் வாழ்க்கை இப்படித்தான் அமைய வேண்டும் என்று வடிவமைத்துக் தருகிற மென்பொருள் ஆகும். உங்கள் தலையெழுத்தை உங்கள் விருப்பதிற்கு நீங்கள் எழுதிக் கொள்கிற கலை மந்திரம் என்று தமிழ் முன்னோர் முன்னெடுத்தனர். அந்த மந்திரம் குறித்து எழுதுவது தனிக் கட்டுரைக்கான தலைப்பாகும்.

ஐந்து அகவை வரையிலுமான குழந்தைகள், இந்த மந்திர ஆற்றல் மூலமாகத்தான் தன் ஐந்து அகவைக்குள் தன் தாய்மொழியை முழுமையாகக் கற்றுக் கொள்கிறது. தன் தாய்மொழியை தான் முழுமையாக கற்றுக்கொள்ள வேண்டும் என்பதான மென்பொருளை வடிவமைத்து அதை தனக்கான தலையெழுத்தாக விசும்பில் எழுதிவிட்டு சாதிக்கிறது. 

ஆனால் ஐந்து அகவைக்கு முன்பாகவே, குழந்தைகளின் விருப்பம் இல்லாமலேயே, பெற்றோர்கள் தங்கள் விருப்பங்களை அந்தக் குழந்தையின் மீதாக திணிக்கும் முகமாக மழலையர்ப் பள்ளிகளில் அந்தக் குழந்தைகளைக் கையளிக்கின்றார்கள். நீங்கள் உங்கள் தலையெழுத்தை யாரோ எழுதுவதாக நம்புவதைப் போல அந்தக்குழந்தையும் தன்னுடைய தலையெழுத்தை பெற்றோர், ஆசிரியர், சுற்றம், நட்பு, உங்களால் அடையாளம் காட்டப்படுகிற தெய்வம் என்று யார்யாரோ தம்முடைய தலையெழுத்தை எழுதுகின்றனர் என்ற முடிவுக்கு வந்து, கொஞ்சம் கொஞ்சமாக வேகம் குறைந்து, எதிர்பார்ப்புகளை நிறைத்துக் கொண்டு, வாழ்க்கையைத் தொலைத்து விட்டு பிழைப்பு நடத்தத் தொடங்கி விடுகிறது. 

'தீதும் நன்றும் பிறர்தர வாரா' என்கிற தமிழர் மந்திரச் செய்தியை மறந்து விட்டு, தனக்கான நன்மையைப்  பிறர் தரவில்லையே என்றும், மற்றவர்கள் தீமையையே தருகிறார்கள் என்றும் புலம்பி அந்தப் புலம்பலையே தன்னுடைய தலையெழுத்தாக வடிவமைக்கத் தொடங்கி அதையே திரும்பப் பெறுகின்றன. 

இதை மாற்றியமைத்து நமது குழந்தைகளின் தலையெழுத்தை அவர்களே எழுதிக் கொள்ளும் முகமாகவே நம்மை முன்னெடுக்க, தமிழ் முன்னோர் நமக்கு விட்டுச் சென்ற மந்திரம் குறித்து நாம் அறிந்து கொள்ள முயன்றால் அது தனித் தலைப்பாகும். 

ஆக கடவுள் என்பது ஆண்பாலோ பெண்பாலே அல்ல. கடவுள் நம்மை படைத்தான ஒன்றும் அல்ல. நம்பிக்கைக்கு உரியதல்ல கடவுள். அறிந்து பயன்படுத்திக் கொள்வதற்கானது கடவுள். கடவுள் எல்லை இல்லாதது. கடவுள் தான்தோன்றி இயக்கம் உடையது அல்ல. கடவுள் நம்மிலிருந்து இயக்கம் பெற்று நம்மை இயக்குகிறது. கடவுள் வெளி, விண்வெளி, விசும்பு என்ற மூன்று நிலைகளைக் கொண்டது.

முதல் எனப்படுவது இடமும் காலமும் என்று தமிழ்முன்னோர் அடையாளப் படுத்துவதில் இடம் என்பது கடவுள். நிலம், நீர், தீ, காற்று என்கிற நாற்திர ஆற்றல்கள் தான்தோன்றி இயக்கதால் காலம் காட்டுகின்றன.

புத்தேள்:-
திருவள்ளுவர் கொண்டாடிய பொருள் பொதிந்த தமிழ்ச்சொல் புத்தேள் ஆகும். இந்தப் புத்தேளிர் அல்லது புத்தேள் என்கிற சொல் திருக்குறளின் பல குறள்களில் பயின்று வருகிறது.

பெற்றாற் பெறின்பெறுவர் பெண்டிர் பெருஞ்சிறப்புப்
புத்தேளிர் வாழும் உலகு. 58
புத்தே ளுலகத்தும் ஈண்டும் பெறலரிதே
ஒப்புரவின் நல்ல பிற. 213
நிலவரை நீள்புகழ் ஆற்றின் புலவரைப்
போற்றாது புத்தேள் உலகு. 234
கள்வார்க்குத் தள்ளும் உயிர்நிலை கள்வார்க்குத்
தள்ளாது புத்தே ளுளகு. 290
புகழ்இன்றால் புத்தேள்நாட்டு உய்யாதால் என்மற்று
இகழ்வார்பின் சென்று நிலை. 966
புலத்தலின் புத்தேள்நாடு உண்டோ நிலத்தொடு
நீரியைந் தன்னார் அகத்து. 1323

மேற்காணும் திருக்குறள்களில் உள்ள, புத்தேள் உலகு, புத்தேள் நாடு என்பனவற்றில் உள்ள புத்தேளுக்கு அறிவார்ந்த என்று பொருள். புத்தேள் உலகு எனில் அறிவார்ந்த உலகு ஆகும். புத்தேளிர் என்போர் அறிவார்ந்தோர் ஆவர். 

திருக்குறளில் ஏதாவதொரு சொல்லுக்கு நடப்பு நிலையில் பொருள் புரியவில்லை என்றால் திருக்குறளில் இருந்தே பொருள் தேட முனைய வேண்டும். இன்றைக்கும் மக்கள் மொழியில் புழங்குகிற மொழி வழக்கில் இருந்து பொருள் தேடுவது அதை உறுதிப்படுத்திக் கொள்ள உதவும். 

மாறாக பிற்கால நூலாறிவு கெண்டு திருக்குறளின் அந்த பொருள் விளங்கா சொல்லுக்கு பொருள் தேட முயன்றால் நூறு விழுக்காடும் பிழையாகியே போகும். ஏனென்றால் திருவள்ளுவருக்கு பிந்தைய நூலாளர்கள் தமிழ் சொற்களின் பொருள்பொதிந்த தன்மையை பல்வேறு அயல்களின் மூலம் எல்லையில்லாமல் சிதைத்து இடுகுறிச் சொற்களாக்கியுள்ளனர். இயல் என்ற சொல்லை சிதைத்தமையை இயற்றமிழ் என்ற சொல்லுக்கான களஞ்சிய விளக்கத்தில் நாம் தெரிவித்திருக்கிறோம்.

நமக்கு நடப்பு உலகு, நடப்பு நாடு தெரியும். புத்தேள் உலகு புத்தேள் நாடு என்ற சொற்கள் தெரியாது. காரணம் மக்கள் வழக்கில் சொல்லாடப்படுவது இல்லை. நூலாளர் வழக்கில் தேடினால், அயலியலுக்குச் சொந்தமான பிழையான பொருளைத் தெரிவித்து வருகின்றனர்.

சரி திருக்குறளில் இருந்தே பொருள் தேட முனைவோமே. இருவேறு உலகத்து இயற்கை திருவேறு
தெள்ளிய ராதலும் வேறு. 374
என்கிற திருக்குறளில் நமக்கு விடை கிடைக்கிறது.

இந்தியாவில், பாஜக நிறுவ முயல்கிற கார்ப்பரேட் உலகமும், தமிழ்நாடு கொண்டாடுகிற, தமிழ்நாடு முன்னெடுத்து வருகிற, தமிழ் மக்கள் வழக்கில் இருக்கிற அறிவாளர் உலகம், அல்லது அறிஞர் உலகம் இரண்டும் இருப்பது இயற்கையின் இயல்புதான் என்கிறார் திருவள்ளுவர் இந்தக் குறளில். 

ஒருவன் பணக்காரன் ஆவதற்கு பலருக்கு கல்வி மறுக்கப்பட வேண்டும். அல்லது அந்த பணக்காரனுக்கு ஏவல் செய்யும் வகைக்கான கல்வி முன்னெடுக்கப்பட வேண்டும். இதை பாஜக விரும்புகிறது, கொண்டாடுகிறது. அதற்கு வட இந்தியா சாத்தியமாகிறது.

தமிழ்நாடு அறிவைக் கொண்டாடுகிற நிலம். தமிழ்நாடு அறிவாளர் உலகத்தைக் கொண்டாடுகிற காரணம் பற்றியே தமிழ்நாட்டில் இருந்து உலகின் முதல் நூறு பணக்காரர்களில் ஒருவரும் இடம் பெறமாட்டார். திருவள்ளுவர்  பயணிக்க நயன்மையான வழி என்று கருதியதும் தெள்ளியர் உலகமே. அதுவும் புதுமை மிகுந்த தெள்ளியர் உலகம். அதையே திருவள்ளுவர் தமது பல குறள்களில் புத்தேள் உலகு என்று கொண்டாடுகிறார்.

அறிஞர் உலகம், திரைஉலகம், ஆணாதிக்க உலகம் என்று நடப்பில் பேசப்படுகிற உலகங்கள் எல்லாம் எப்படி நில எல்லை சார்ந்த நாடுகள் அல்லவோ! அதுபோலவே திருவள்ளுவர் கொண்டாடும் புத்தேள் உலகமும், புத்தேள் நாடும், நில எல்லை சார்ந்தது அன்று. அந்தத் தலைப்பில் அமைகிறவர்களின் ஒரு வட்டம் ஆகும். 

நாடகத்தமிழ்:-
முதல்தமிழ் நாடகத்தமிழ். மொழிக்கு முந்தைய உடலசைவு மொழியை நாடகத்தமிழ் என்று தமிழ் பதிவு செய்து கொண்டிருக்கிறது. இன்றைய திரைப்படம், இணையத்தில் குறும்படம், தொடர்கள் வரை நாடகத்தமிழ்தான் மிக மிக நெடியது. தமிழர்கள் திரைப்படக் கலைஞர்களுக்கு முதன்மைத்துவம் தருகிற போக்கும் உள்ளீடாக கொண்டு போற்றிக் கொள்ளத் தக்கதே. நாடகக் கலை என்று தமிழர் அனுபவங்களைத் தொகுக்க முயன்றால் தமிழின் காலம் சில நூறாயிரம் (இலட்சம்) ஆண்டு காலத்திற்கு முன்பு இருந்து தொடங்கும். 

இசைத்தமிழ்:- 
தமிழன் பைய நாவை அசைத்து பைந்தமிழை இசையாக நீட்டி முழக்கிய காலம். தமிழன் முதலில் உருவாக்கிய மொழி இசைத்தமிழே. மூச்சை உள்ளிழுத்து வாஅஅஅஅஅ என்று அழைத்தமையும், மூச்சை வெளியேற்றி போஒஒஒஒஒஒ என்று பணித்தமையும் தமிழனின் தொடக்க நிலை கட்டளைஇசைச் சொற்கள். அம்மாவை மாஅஅஅஅ என்றும் அப்பாவை பாஅஅஅஅஅ என்றும் அழைத்தமை தமிழனின் தொடக்க நிலை உறவுஇசைகள். தமிழன் முதலில் பாடிய நெடும்பாட்டு தம் குழந்தையை உறங்க வைக்கப் பாடிய தாலாட்டு. தமிழ் இசைக்கலை என்று தமிழர் அனுபவங்களைத் தொகுக்க முயன்றால் தமிழின் காலம் சில பத்தாயிரம் ஆண்டு காலத்திற்கு முன்பு இருந்து தொடங்கும். 

இயற்றமிழ்:-
முத்தமிழில் இறுதியானதுதான் இயற்றமிழ். அதில் எழுத்து சொல் என்று மொழிக்கான இலக்கணமும், பொருள்இலக்கணம் என்று வாழ்க்கைக்கான இலக்கணமும், இன்றைக்கு இருக்கிற கணினி இணையம் வரை அனைத்தும் அடங்கும். இதற்கு அடுத்து நான்காவது தமிழ் என்பதாக ஒரு தமிழை வடிவமைப்பதற்கான தேவை எதுவும் உருவாகவில்லை. இயற்றமிழ் என்ற தலைப்பில் தமிழர் அனுபவங்களைத் தொகுக்க முயன்றால் தமிழின் காலம் பல ஆயிரங்கள் ஆண்டு காலத்திற்கு முன்பு இருந்து தொடங்கும். இயற்றமிழ் என்பதை ஆங்கிலத்தில் சயின்ஸ் இன் தமிழ் என்று மொழிபெயர்க்கலாம். ஏனெனில் இயல் என்கிற தமிழ்ச்சொல் ஆங்கிலத்தின் சயின்சுக்கு நேரான சொல் ஆகும். இயற்றமிழ் என்பது தமிழில் சயின்ஸ் என்கிற நிலையில், பொதுவான சயின்சை தமிழில் இயல்அறிவு என்று சுட்டுவதே சரி. அறிவியல் என்று மொழிபெயர்ப்பது தமிழனுக்கு சயின்சே இருந்ததில்லை ஆங்கிலத்தில் இருந்தே பெறுகிறோம் என்பது போலாகிவிடும். அறிவு குறித்த சயின்சே அறிவியல் ஆகும். சயின்சை அறிவியல் என்பது பிழை. இயல் என்பதே சரி, இயல்அறிவு என்று சொல்வதில் பிழை வரவில்லை.

முத்தமிழ்:-
தமிழனின் நெடிய தொடர்ச்சியின் அனுபவங்கள் அனைத்தும் தமிழில் பதிவு செய்யப்பட்டிருக்கிறது. தமிழை நெடிய தொடர்ச்சி உடையது என்று காட்ட, தமிழன்- தமிழுக்கு முத்தமிழ் என்று பெயரிட்டிருக்கிறான். 
உலகில் எந்த மொழிக்கும் சைகை மொழிக்காலத்தில் இருந்து வரலாறு தொடங்காது. உலகமொழிகளில், எந்தமொழி முதல், என்று கண்டறிவதே சாத்தியம் இல்லாத பணி ஆகும். ஏனெனில் உலக மொழிகளுக்குள் அத்துனை கலப்பு நிகழ்ந்திருக்கிறது. ஆனால் தமிழ் அவ்வாறனது அல்ல. தமிழ்- மூன்று பக்கம் கடலாலும் ஒரு பக்கம் இமயப் பெருமலையாலும் பாதுகாப்பாக அமைந்த நாவலந்தேய மண்ணில்- அடுத்த இனத்தை, தன்இனத் தோற்றத்தில் இருந்தே, சந்திக்க வேண்டிய தேவை எழாமல், தனித்த இனமாக வளர்ந்து வந்ததால் உலகில் தமிழ் மட்டுமே தனித்த மொழியாக உள்ளது. 
சைகை மொழிக் காலமான நாடகத்தமிழ், தொடர்ந்த இசைத்தமிழ். அறிவூட்டம் மிகுந்த இயற்றமிழ் என்று நூறாயிரம் ஆண்டுகளுக்கு மேலான தனித்த வரலாற்றுக்குச் சொந்தமானது தமிழ்மொழி என்று பறைசாற்றுவதற்கு தமிழுக்கு அமைக்கப்பட்ட வரலாற்று அடிப்படை தலைப்பே முத்தமிழ்.

காப்பு:-  
காப்பு என்கிற சொல் தமிழுக்கு மிகப் பழமையானது. தமிழர்கள் தங்கள் பொங்கல் திருவிழாவில், பொங்கலிடுவதற்கு முதல்நாள் 'காப்புக்கட்டுதல்' என்ற பெயரில் வீட்டின் வாயிலில் மருத்துவ குணமுள்ள மூலிகைகளான- வேப்பிலை, பீளைப்பூ, ஆவாரம்பூ கொத்துகளைச் சொருகி, நமது வீட்டிற்கும் வீட்டில் உள்ளவர்களுக்கும் காப்பு செய்துள்ளோம் என்கிற அறிவிப்போடு நான்கு நாள் கொண்டாடும் பொங்கல் விழாவைத் தொடங்குகிறோம்.
பேறுகாலத்தில் பெண்களுக்கு பாதுகாப்பு அளிக்க வளைகாப்பு செய்வதை கட்டிச்சோறு கட்டி பெரு விழாவாகவே கொண்டாடி வருகிறோம். பேறு காலத்தில் பெண்கள் மெதுவாக இயங்க வேண்டும் என்ற நோக்கத்தில் அவர்களின் கைநிறைய எளிதாக உடையும் வகையான வளையல்களை அணிவித்து எச்சரிக்கை செய்கிறோம். அந்தப் பெண்களுக்கு வளைகாப்பு கட்டியதை கட்டிசோறு கட்டி கொண்டாடுகிறோம். 
பிறந்த குழந்தைகளுக்கு- காப்பு வகைக்காக வசம்பை சிறு துண்டுகளாக நறுக்கி கோர்த்து காப்பாக, குழந்தைகளின் கையில் அணிவிக்கிறோம். மேலும் ஐந்து மாழைகளால் செய்யப்பட்ட காப்புகள் அணிவிக்கிறோம். குழந்தைகள் ஆட்டி மகிழ்ந்து தங்கள் இயக்கத்தைப் புரிந்து இயங்குவதற்;காகவும். கொஞ்சம் வளர்ந்து, ஓடி விளையாடும் குழந்தைகள் அங்கு இங்கு எங்கு செல்கின்றன என்று ஓசையின் மூலமே அறிந்து கொள்ள, காலில் சலங்கைத் தண்டைகளை காப்பாக அணிவிக்கிறோம். 
திருமணத்தில் மணமக்களுக்கு காப்பு அளிப்பதற்காக பாலைக்கால் நட்டு மணவிழாவைத் தொடங்குகிறோம். வீடு கட்டும் போதும் பாலைக்கால் நட்டு தொடங்கி காப்பு செய்கிறோம்.
தமிழரின் முதல் இலக்கண நூலான தொல்காப்பியம்- காப்பியம் என்றே அழைக்கப்படுகிறது. இலக்கணம் என்பதற்கு காப்பியம் என்பதே மிகப்பழைய வடிவம் என்பதற்கு தொல்காப்பியமே சான்று ஆகும்.
காப்பு, என்ற பொருள் பொதிந்த தமிழ்ச்சொல்லையும், காப்புக்கட்டு, என்கிற நடைமுறையையும் தொடர்ந்து கொண்டாடுவது தமிழர் ஒவ்வொருவரின் கடமையாகும்.

மௌவலின் தினசரி செய்திகளை உடனுக்குடன் பெற, Facebook, Twitter மற்றும் Google Plus போன்ற சமூக வலைதள பக்கங்களில் பின்தொடருங்கள்.